Eftirsjá að Eden, sem verður vonandi byggður upp á ný!

Sorglegt er að lesa þessa frétt um brunann á Eden, sem er fyrirtæki sem hefur verið til staðar eins og fastur steinn í læknum, eða þúfan eða hóllinn í móanum, á ferðum okkar um Suðvesturhorn landsins í gegnum tíðina. Vonandi verður staðurinn byggður upp.

Sjónarvottur segist hafa séð upphaf brunans við eldhús Edens. Þetta er umhugsunarvert í ljósi þess að í stórum brunum sem hafa orðið á s.l. árum, þá mátti víst rekja brunana til eldhúss fyrirtækjanna, t.d. þegar kviknaði í á Þingvöllum og í gömlu húsunum við Lækjargötuna árið 2007.

En það er sérfræðinga að meta áhættu og aðstæður í eldhúsum á veitingastöðum.

Sá sem stofnaði Eden upphaflega, snemma á 7. áratugnum, hann Bragi, verslaði oft við mig á Selfossi, þegar ég var að stíga mín fyrstu skref á vinnumarkaðnum. Hann keypti reglulega fullt af bakkelsi í bakaríi, þar sem ég var að vinna eitt sumar snemma á 8. áratugnum. Ef kúnni þurfti pappakassa undir bakkelsið, kostaði kassinn sitt, eins og plastpokar í dag.

Í fyrsta skipti þegar ég afgreiddi Braga með bakkelsið, var hann ekki sáttur að borga fyrir umbúðirnar, eða téðan pappakassa, einn eða fleiri, þar sem hann væri að versla mikið magn. Ég áttaði mig strax á að það væru rök fyrir þessu hjá honum og hann fékk umbúðirnar fríar.

Þarna var ég að stíga mín fyrstu skref í viðskiptum sem óharnaður unglingur, 15 ára krakki, og sem lærði að maður á að gefa einhvers konar magnafslátt, þegar viðskiptavinurinn kaupir mikið og jafnvel oft hjá manni. Þökk sé Braga í Eden.

Eldurinn breiddist hratt út

Björgunarsveit bjargar hrossi.

Eftir að hafa lesið þessa frétt, þá finnst mér að björgunarsveitir, sem bjarga ótrúlegustu hlutum, fái ekki nægilega umbun fyrir sín störf. Hafa björgunarsveitir fengið fálkaorðu? Mín tilfinning er sú, að starf björgunarsveitarmanna fái ekki næga viðurkenningu í samfélaginu. Meiri áhersla er á viðurkenningu fót- og handbolta manna og kvenna. Aðallega manna. Ef strákarnor okkar 'vinna' eiga þeir jafnvel von á fálkaorðu.

Hvað værum við stödd án hinna ýmsu björgunarsveita, og ekki síst hjálparsveitinni Dalbjörgu??

Hrossi bjargað úr haughúsi

Málið alvarlegt ... eða hvað? Hvaða mál annars?

Maður les af og til hálfkaraðar fréttir hér á mbl.is og fyrirsögnin á fréttini var um "Málið litið alvarlegum augum" eins og maður ætti að vita um hvað fréttin fjallaði eða væri inni í málinu.

En alvarlegt ástand varð víst í Bolungarvíkurgöngum í gærkvöldi, þegar kveikt var á tveimur neyðarblysum þar. Get ímyndað mér að mikill ótti og ringulreið hafi ríkt þarna í þessum aðstæðum. En ekkert kemur fram í fréttinni um hver hafði kveikt á þessum blysum og af hverju. Vonandi fáum við lesendur á mbl.is uppfærslu á þessari frétt.

Málið litið alvarlegum augum