Löggan aftur og nýbúin ... Allir þessir strákar hafa greinilega ræktunargenið í sér!

Lögreglan stöðvaði kannabisræktun, í frétt á mbl.is:

"Lögreglan á höfuðborgarsvæðinu upprætti enn eina kannabisverksmiðju í dag. Nú var stórtæk verksmiðja stöðvuð í nýbyggðu einbýlishúsi í Hafnarfirði. Ekki var flutt inn í húsið en um 300 plöntur í fullum blóma voru í húsinu. Tveir menn hafa verið handteknir vegna rannsóknar málsins."

 

Það kemur á óvart hvað þessir strákar hafa 'græna putta' miðað við ræktina á öllum þessum fínu plöntum. Á hverjum degi fáum við fréttir af strákum sem hafa verið handteknir fyrir kannabisræktun. Ég bara skammast mín, enda hafa allar stofuplöntur hjá mér sungið sitt síðasta. Mér tókst ekki að halda endalausu lífi í þessu. Þegar ég lít yfir sviðið hjá mér sé ég bara bunka af gervistilkum í glærum vasa. Ja hérna. Kannski vantaði mig hvatann til að leggja rækt við stofuplönturnar. En ef þetta hefði verið ræktun til að hafa ágóða af því, þá hefði maður kannski verið natnari við plöntugreyin. Ætli strákarnir tali við kannabisplönturnar sínar, eins og maður heyrði að húsmæður gerðu hérna í gamla daga?

 

En strákarnir kunna þetta greinilega og það er kannski í þeirra innsta eðli að rækta grænar plöntur, af því að þetta er arðbært, en því miður ólöglegt. Nú sitja kannski feður og mæður þessara strákgutta og horfa í gaupnir sér og eru e.t.v. miður sín yfir framferðinu. En þau geta huggað sig við að heimspekingurinn Plato hafði einhvern tíma á orði að "af öllum skepnum er drengur sá sem ill mögulegast er að hafa stjórn á" eða eitthvað á þá leið.

 

Já, strákarnir fara sínu fram, hvað sem tautar og raular. Og mig rámar í orðatiltæki, sem er líklega frá Kahlil Gibran, sem segir að 'börnin þín eru ekki þín. Þau eru synir og dætur Lífslöngunarinnar sjálfrar.' Vissulega hafa synir, og dætur, löngun til að græða.

 

Þannig að foreldrar ræktunargæjanna, eða 'grænu puttanna' eiga ekki að vera með neitt samviskubit yfir uppeldinu. Afkvæmin bera ábyrgð á sínum gjörðum. Og sinni lífslöngun.

 

 

Stórfelld kannabisræktun stöðvuð

Athugasemdir

[Helgi Helgason (IP-tala skráð) 28.3.2009 kl. 01:26]

Þetta eru yfirleitt ungir ómenntaðir menn sem sjá ekki fram á annað en atvinnuleysi, því freistandi að rækta kannabis, mér skilst að það sé ekki mjög flókið verk og gefur vel af sér. Þeir eru óreyndir og láta því "bösta" sig. Þykir líklegra að kannabis lækki verði frekar en hitt enda virðast menn vera að streyma inn á þennan markað.

[Ingibjörg Magnúsdóttir, 28.3.2009 kl. 21:01]

Sæll Helgi, já þessir strákar eru a.m.k. menntaðir í að rækta þessar plöntur. Það  er þekking og skólun út af fyrir sig. Vitanlega vill enginn láta "bösta" sig og sá sem fer út í þessa ræktun gerir það með því markmiði að reyna að fela þetta vel. Samt hefur lögreglan komist á snoðir um þetta og gert mörg gróðurhús upptæk. En mun verðið bara ekki hækka á þessu, eftir að öll þessi gróðurhús hafa verið tekin niður?