Litið yfir farinn veg - árið 2007 kvatt

Upphaf ársins 2007 einkenndist af umræðunni um Byrgismálið. Síðan tók Breiðavíkurmálið við. Engin gúrkutíð í ársbyrjun 2007, þó að margar gúrkur hafi einkennt árið og aðal gúrkufréttin er væntanlega hundsmálið á Akureyri.

 

Síðan má nefna kosninguna um stækkun álvers í Hafnarfirði, dóminn í Baugsmálinu, dóm í nauðgunarmáli og dóm í tálbeitumálinu. Nýbúar  voru áberandi í þjóðfélagsumræðunni. Hver man ekki eftir þeirri umræðu í tengslum við Frjálslynda flokkinn og ríkisborgaramálið (svok. Jónínumál þegar tilvonandi tengdadóttir hennar fékk fljótafgreiddan ríkisborgararétt). Og fyrsti nýbúinn tók sæti á Alþingi.

 

Í maí var bombu kastað í þætti eða fréttum í RÚV varðandi svik og pretti í fiskveiðimálum, og landsmenn fengu fréttir af fiskverkunum sem lögðu upp laupana og/eða eigendur urðu gjaldþrota á árinu og í júlí var þorskkvótinn skorinn niður.

 
Umræðan var heit í október vegna REI málsins og meirihluti borgarstjórnar féll, og Reykvíkingar fengu nýjan borgarstjóra. Myndin sem fylgir hér með kalla ég "Teikn á lofti yfir ráðhúsinu." Þetta er reyndar ekki ný mynd, en hana tók ég sumarið 2004.

 

 

 

 

 

 

 

 

Þegar leið að árslokum voru fréttir af FL-Group málinu fyrirferðamiklar vegna hruns á verðbréfamörkuðum og mikillar lækkunar á félögum í íslensku kauphöllinni. Félag Jóns Ásgeirs kaupir stóran hlut í FL-Group til að bjarga félaginu, Hannes Smárason ofurfjárfestir og forstjóri víkur fyrir Jóni Sigurðssyni sem tók við í brúnni. Margir sáu fyrir sér kauptækifæri í íslenskum félögum, en þau héldu áfram að lækka. Markaðir erlendis náðu að rétta aðeins úr kútnum fyrir áramótin, en félögin í íslensku kauphöllinni eiga langt í land með að ná þeim hæðum sem þau stóðu í um mitt s.l. sumar.

 

Veður ársins er eftirminnilegt, enda nokkuð öðruvísi en vanalega. Ég man eftir mörgum dögum seinni hluta vetrar (janúar og fram á vor) sem einkenndust af roki og rigningu. Sumarið 2007 var einstakt, enda kom varla dropi úr lofti og það var sólskin dag eftir dag. Ég var fegin þegar að loksins kom smá úði á sunnudegi síðsumars, þ. 29. júlí. Kannski man ég eftir þessari dagsetningu af því að þetta var sama dag og Sæbrautarmorðið var framið. Ef til vill voru færri gangandi vegfarendur á ferðinni á Sæbrautinni en ella vegna úrkomunnar þennan dag.

 

Haustið 2007 var líka einstakt vegna þess að veðrið einkenndist af roki og úrkomu, en yfirleitt hafa haustin verið sólrík og stillt. Í desember fór ég að taka eftir ákveðnu mynstri í veðrinu: frá og með 10.12. var alltaf hífandi rok og rigning; brjálað veður á mánudögum, miðvikudögum og föstudögum. Það snjóaði reyndar 13. des. og við fengum meira að segja hvít jól í höfuðborginni!

 

Á aðfangadag voru ákveðin teikn á lofti þegar að Reykvíkingar og fleiri landsmenn heyrðu og sáu þrumur og eldingar í miðju jólaborðhaldi um kl. 18:30. Fyrst sá ég blossa og hélt að verið væri að taka mynd í einhverri íbúð í húsinu og síðan heyrðust sprengingar og hélt ég að einhverjir gaurar væru að skjóta upp flugeldum (hver myndi svo sem skjóta upp á aðfangadagskvöldi í miðjum mat??). En mér fannst þessi þruma vera skilaboð um hvernig jóla- og áramótaveðrið myndi verða: hryssingslegt.

 

Og árið endaði reyndar á klikkuðu veðri, enn einn mánudagurinn, á gamlársdag 31.12.2007, þannig að áramótabrennunum var meira að segja frestað fram á nýársdag.

Og þennan dag var Fíkniefnalögreglan valin maður ársins. Á hún það fyllilega skilið enda náð ófáum þrjótum á árinu. Er nokkur búinn að gleyma “Aðgerð Pólstjarna”?

En sem betur fer var veðrið nokkuð skaplegt er nálgaðist miðnætti, þannig að það sást vel til þegar farið var að skjóta upp flugeldum eftir að Skaupinu lauk. Þannig að árið endaði bara nokkuð vel, sem er góðs viti varðandi nýtt ár, 2008.

 
En það er eitt í viðbót sem kom fram á árinu 2007, en það voru fréttir af því að einkarannsókn er hafin á Hafskipsmálinu. Spennandi verður að heyra hvað kemur út úr þeirri rannsókn!