Var byssustrákurinn einhvern tíma á þessum leikskóla?

Í ljósi frétta af meintum byssuvargi í Smáíbúðahverfinu er kominn tími til að

setja á laggirnar hertari reglugerð varðandi skotvopnaeign.

 

Lögreglan hér á landi gengur t.d. ekki dags daglega um vopnuð.

Guði sé lof fyrir það. - Ef stjórnvöld (lesist = Björn Bjarnason) gera ekkert í

málinu, getum við átt von á óargaöld hér á landi hvað varðar skotvopn

og nokun þeirra.

 

Vil minna á morðmálið á Selfossi árið 2004 eða 2005.

Krakki komst yfir byssu föður síns og varð vini að bana.

Þetta flokkast líklega ekki sem 'morðmál' heldur 'voðaskot'

í hugum einhverra. En hvernig skyldi aðstendendum dregnsins

sem varð fyrir þessu voðaskoti líða í dag??

Og hvað var gert í því máli? Ef eitthvað var gert.

Þetta mál var í fréttum á sínum tíma og síðan ekki söguna meir!

Missti sá maður byssuleyfið? Voru vopn hans gerð upptæk?

Voru reglur hertar um byssueign og geymslufyrirkomulag

eftir þennan harmleik? Mjög líklega ekki! A.m.k. man ég ekki

eftir fréttum af slíkum aðgerðum í kjölfar þessa harmleiks.

Mikilvægt er að semja reglugerð um þá sem hafa leyfi fyrir skotvopnum, 

og ef fjölskyldumeðlimir eða aðrir komast yfir þessi skotvopn,

að þá missi viðkomandi skotvopnaleyfið. Einfaldlega og engar refjar.

En af hverju þarf fyrrverandi lögreglumaður á leyfi að halda

fyrir marghleypu sem svo sonur hans tekur ófrjálsri hendi

og skýtur á, af öllu, leikskóla?

 

Þarf að rannsaka eitthvað hér? Var þessi drengur í þessum leikskóla á sínum tíma?

Var drengurinn að ná sér niðri á veru sinni á leikskólanum, eða hvað?

Þetta er mjög alvarlegt mál. Af hverju skaut hann ekki úr byssunni á fleiri staði?

Hann virtist bara hafa skotið á leikskólann.

Þeir sem eiga skotvopn, eiga ekki að bjóða upp á það að almenningi stafi hætta af þeim.
Ef einstaklingur getur ekki átt byssu án þess að einhverjir vitleysingar veifi þeim um í
hverfum borgarinnar, svo ekki sé nefnt að verið sé að skjóta á leikskóla, á sá hinn sami
að missa byssuleyfið tafarlaust og öll skotvopn viðkomandi verði gerð upptæk.

T.d. þegar var verið að rannsaka morðið á leigubílstjóranum Gunnari Tryggvasyni, þá
hafði sonur grunaðs morðinga, ásamt vini, verið á fullu að prófa að skjóta úr byssu grunaðs,

eftir að hafa nappað byssu og skotum frá þessum grunaða föður.

Þeir vinirnir voru sem betur fer ekkert að beina byssu að borgurum Reykjavíkur, en voru að
prófa byssu á víðavangi. En það er engin afsökun.

Byssur á glámbekk eru alltaf vísun á harmleik

Mikilvægt er að herða reglur um byssuleyfi og byssueign. Ef ekkert veður að gert, eigum við
óöld yfir hausnum á okkur. Skora á Björn Bjarnason dómsmálaráðherra að keyra

nýja og herta reglugerð um skotvopnaeign í gegnum þingið!!!

 

Við erum lítið land og fámenn á við mörg önnur Evrópulönd og eigum að geta

haft hemil á byssum, byssueign og þar af leiðandi einstaklingum sem

dúkka upp hér af og til upp úr 'skotgröfunum.'

Skaut úr skammbyssunni

Vilborg í stjörnufans

Einu sinni var mér sögð falleg saga, á aðfangadag fyrir mörgum árum,

af Vilborgu og bræðrum hennar á Seyðisfirði.

 

En í ljósi þess gjörnings sem Vilborg viðhafði í dag fyrir framan

stjórnarráðið, það að staga í sokka, er einmitt einkennandi fyrir

athafnir sem húsmæður þurftu að framkvæma þegar Vilborg var ung.

Allt var notað; stoppað var í sokka, fatnaður stagbættur og saumað upp úr fatnaði. 

Líklega hefur Vilborg tekið upp þessa verkþætti þegar hún var sjálf orðin húsmóðir.

Enda hvorki til Hagkaup, Ikea né Kolaportið á þeim tíma.

Matvörur og fatnaður var skammtaður í verslunum hér á landi á tímabili.

 

Þegar Vilborg var ung kona og upprennandi penni, var jafnvel töluvert mál að eignast ritvél.

Enda lifði unga fólkið hvorki á yfirdrætti né krítarkortum. Það voru helst einhverjir vinir,

frændur eða tilfallandi velgjörðarmenn sem lánuðu ungu fólki smá aur, ef mikið stóð til. 

 

Eftir að Vilborg hafði dvalist erlendis um tíma, var heilmikið mál fyrir hana að komast

heim til Seyðisfjarðar eftir heimkomuna, sem hún fór að hluta til á puttanum,

mjög svo félítil, en komst þó að lokum, þrátt fyrir að lenda í bíl með kvikindislegum

kónum á leðinni, sem fengu reyndar rækilega á baukinn síðar þegar bíllin þeirra bilaði og

eftir að hafa verið búnir að henda Vilborgu út á gaddinn.

Sagði hún frá þessu í áhugaverðu viðtali á öldum ljósvakans fyrir nokkrum árum. 

Mig minnir að hún hafi fengið lánaðan 500 kall, hjá velgjörðarmanni,

sem hún notaði til að kaupa ritvélina og fyrir farinu heim.

 

En nú eru að koma jól, og sagan af Vilborgu og bræðrum hennar, sagði faðir minn mér seint á

9. áratug síðustu aldar, nánar tiltekið á aðfangadagskvöld. En faðir minn var fæddur á Seyðisfirði og ólst þar upp sem ungur krakki og lék sér með bræðrum Vilborgar. Það er stjörnubjart kvöld og krakkarnir eru úti að leika sér.

Þau eru staðsett við torfbæ, og stjarna, eða stjörnur, blika við mæninn á burstinni.

Bræður Vilborgar eru stríðnir og mana hana til að ná sér í stjörnu. Vilborg bítur á agnið og klöngrast upp á mæninn og teygir sig eftir stjörnunni. - Ekki fylgir sögunni hvernig hún brást við því að ná ekki til stjarnanna.

 

En þessi litli barnaleikur sýnir glöggt að Vilborg var meira en til í að eignast eitthvað fallegt og að

sama skapi til að teygja sig út fyrir 'kassann' til að öðlast nýja reynslu. Kannski var þessi litli

gjörningur Vilborgar uppi á burstinni e.t.v. bara fyrsta sýnishornið af þeim gjörningum sem

Vilborg var, og er, tilbúin til að taka sér fyrir hendur?

Mótmælir og stagar í sokka

Kvakk, kvakk - Bakkabræður braska

Bakkabræður sverja sig greinilega í ætt við aðra glæfra-álfa sem

hafa farið mikinn í íslensku viðskiptalífi og útrásum hér síðustu misserin,

þ.m.t Björgólfarnir, Hannes Smára & Co. og Jón Ásgeir & Co. ásamt fleirum.

 

Samt undrandi á að enginn af þessum aðilum hafi tekið yfir

sorphirðuna hér á höfuðborgarsvæðinu. Enda ekki í útboði og líklega ekki nógu fínt fyrir þá!

En kannski ekki - enda ekki nógu framsýnir þó að þeir ætluðu sér

kannski sorphirðuna að lokum. Þeir yfirtóku stærstu bankana

til að hafa völd yfir því hversu mikið þeir gætu fengið lánað þar.

Þegar þeir voru búnir að þurrmjólka bankana, og ekkert meira þar að

hafa, lentu þeir allir í vandræðum. Og höfðu ekki fattað að bankar

gætu orðið gjaldþrota eins og hver önnur loftbólufyrirtæki. 

 

Og nú ætla t.d. Bakkabræður að þurrmjólka Existu, kaupa og selja

í þessu loftbólufyrirtæki sér í hag.

 

En þar hefst sorphirðan: að eignast restina af Existu - nógu andskoti ódýrt. 

En reyndar verður sorphirðan að andstöðu sinni: kasta út litlum hluthöfum í félaginu,

gera þá að engu. Það kallast sorpeyðing. Það er líka miklu fínna en 'sorphirða.'

 

Allt þetta álfa-lið, sem hefur litla framsýni, er engu betra en Mafían

sem stjórnaði öllu í New York á sínum tíma, og stjórnar kannski að hluta ennþá.

Nú þarf íslenska þjóðin á að halda virkilega ötullum saksóknara, eins og NYC hafði á sínum tíma

til að rannsaka gerðir allra þessara álfa og koma fyrir kattarnef, í eitt skipti fyrir öll,

ef eitthvað ólöglegt hefur átt sér stað. Hint: það er lenska hjá öllum stórum

fjárfestum að fela fé í skattaparadísum. Og hef ég það fyrir víst að það er, eða var,

lögmaður í Landsbanka sem ráðlagði aðilum um hvernig átti að bera sig að

varðandi þennan þátt.- Hefur líklega þjónað mögrum köllum og kellingum sem

hafa líklega komið sínu í einhverja ónefnda banka í gegnum Luxemburg.

En þaðan ku víst vera erfitt að rekja færslur áfram.

 

Og þó að nokkur tími sé í næstu áramót, detta mér strax í hug þessar ljóðlínur:

"... og stórir komu skarar, af álfum var þar nóg ..." Og þér blésu víst í sönglúðra,

sem eru nánast þagnaðir, en samt greinilega ekki. Álfarnir halda áfram að

reyna að ná tóni út úr fölskum lúðrinum. 

 

 

Og hér er hluti af annarri frétt um Bakkabræðra-álfana (eða átti ég að segja

'mafíósana'?) - tekin af amx.is :

 

BBR ehf., félag í eigu Lýðs Guðmundssonar og Ágústar Guðmundssonar, hefur í dag skráð sig fyrir nýju hlutafé í Exista að fjárhæð 50 milljarðar króna í skiptum fyrir 1 milljarð hluta í Kvakki ehf. Þetta þýðir að gengi á hlut er 0,02 krónur. Þeir bræður ætla að gera yfirtökutilboð í allt hlutafé Exista á sama gengi og hafa óskað eftir undanþágu frá Fjármálaeftirlitinu hvað varðar reglur um lágmarksverð.

Þessi viðskipti fela í sér að fyrri eigendur Kvakks ehf., Ágúst Guðmundsson og Lýður Guðmundsson, leggja Exista til 1,0 milljarð króna í reiðufé.

Eftir viðskiptin eiga félög fjárhagslega tengd Lýð Guðmundssyni og Ágústi Guðmundssyni 56.407.905.675 hluti í Exista, eða samtals 87,9% af heildarhlutafé.

Stefna að yfirtöku á stjórn Exista

Míg andi við Austurvöll!

Slæmt að þurfa að létta á sér á almannafæri og eiga von á sekt, þjóðþrifum og jafnvel fangsleisvist

(a.m.k. við fleiri tilfellum). 

 

Þetta atvik sýnir kannski að þörf verður á einhvers konar 'Míg-anda' eða pissu-kömrum fyrir æ-fjölgandi

mótmælendur á Austurvelli í kreppunni, en mótmælendum mun líklega fjölga með hækkandi sól, eins og einhver mætur maður staðhæfði í Kastljósi í gærkvöldi.

 

Nú eru stjórnvöld að styrkja ný sprotafyrirtæki, þannig að hér er líklega kærkomið

tækifæri fyrir sprotafyrirtæki til að stofna ný fyrirtæki í kreppunni og bjóða upp á piss-húss þjónustu á

götum úti; Austurvelli, Arnarhóli og jafnvel uppi á hálendinu, þegar umhvefisverndarsinnar

láta til skarar skríða þegar fer að vora og fara að mótmæla nýjum álverum og hugsanlegum nýjum

raforkuverum ... og kanski olíuvinnslu á Drekasvæðinu ...

 

Margir mæta á Austurvöll og mörgum verður mál, þó að þeir haldi í sér og láti á engu bera. Þó að

fólk pissi áður en það fer að heiman, fer það í spreng ef það gæðir sér á kjötsúpu.

Mér skilst að það hefðu verið biðraðir í fría kjötsúpu

á mótmælafundinum á Austurvelli s.l. laugardag, 29.11.2008.

 

Mönnum gæti líka orðið brátt í brók á Arnarhólnum, þegar þeir mæta þangað til að

mótmæla ástandinu í kreppunni. Ekki dugir að spræna í runna í frostinu, enda gæti þetta

allt frosið í miðri bunu og kallað á sekt, affrystingu og sjálfshreingerningu. Hver nennir

því mitt í kreppunni?

 

Og þeir sem ætla að venja komur

sínar á Svörtuloft til að mótmæla setu seðlabankastjóra, hlýtur að verða mál við að

sitja í anddyri slotsins í tvo tíma og þurfa margir hverjir líklega á svona þjónustu að halda.

Enda hafa ekki allir selskapsblöðrur. Sérlega ekki óþolinmóðir mótmælendur.

 

Þess vegna getum við átt von á að sjá pissu-húsafyrirtæki spretta upp á næstunni,

í boði frumkvöðla, enda betra að beisla þetta í eh-effum en í frjálsu falli á mætar

byggingar, runna og glerrúður. Þar sem miklar þvögur myndast í mótmælum, á landinn

eftir að geta pissað í boði ÞVAG-an ehf. og líklega Sprænir efh. Og þeir sem mótmæla

uppi á hálendinu, munu geta pissað í boði H-landið ehf. Og þeir sem vilja lesa áróður á meðan klósettferðinni

stendur, geta fengið að gera það þegar fram líða stundir, og þá  hugsanlega í boði SAUR-blað ehf.

 

En svo vantar bara hugvitssama aðila til að hanna nægilega meðfærileg

pissu-hús sem eru auðveld í notkun, flutningi, hreinlæti og umhvefisvernd.

 

Og svo er bara spurning hvort stjórnvöld taki tillit til almennings og

stofnenda slíkra fyrirtækja í kreppunni: fá þeir að framkvæma þetta skattfrjálst???

Gekk örna sinna í runna á Austurvelli

Atkvæðaveiðar stjórnarandstöðunnar - pöbbinn á Akureyri?

Ég lenti í skemmtilegum félagsskap með fólki að Norðan nú í byrjun september 2008.
Var þá tjáð að Steingrímur J. alþingismaður ætti það til að mæta út á lífið þarna
fyrir Norðan, standa á barnum, aðhafast ekkert, eða þangað til einhver byði honum í glas.

Kannski sjá Norðlendingar Steingrím í þessu ljósi. Kannski vill Steingrímur bara láta
líta út sem að honum liggi lífið ekkert á. En að skreppa á barinn er þekkt
leið til atvkæðaveiða meðal stjórnmálamanna. (En í kreppu þarf auðvitað að hafa hraðar hendur, eða þannig. ...)

Í eitt skiptið kemur ungur Akureyringur á bar þarna fyrir Norðan til að panta sér drykk,
og sér að Steingrímur stendur við barinn. Um leið og sá ungi pantar sér
bjór, pantar hann í leiðinni mjólkurglas handa alþingismanninum.

Þá varð þessi vísa til:

Steingrímur karlinn staldrar við þyrstur
við barinn hann stendur en vill ekki fyrstur
bjóða í glas, og forðast allt þras
en þiggur með þökkum eitt mjólkurglas.

Telur vantrauststillögu efla samstarf ríkisstjórnarinnar

Samhengi milli bruna á bílum og frystihúsum?

Mér er í fersku minni fréttir af ýmsum brunum á frystihúsum úti á landi hér áður fyrr, framar öðrum brunum, fyrir utan hlöðubruna á ýmsum býlum í sveitum þessa lands.

Kannski er þetta mér í svo fersku minni, af því að þegar ég var yngri las ég aðallega slysafréttir í blöðum og skrýtlur, frekar en leiðara og aðrar pólitískar greinar. 

Man ekki hvort einhverjir frystihúsabrunar hafi orðið á höfuðborgarsvæðinu á 8. 9. og 10. áratugnum. 

En það hefur lítið farið fyrir fréttum af frystihúsabrunum yfirleitt s.l. misserin. Kannski er farið að klæða, endurgera og byggja frystihús úr óbrennandi efni, eða hvað?

Og kannski kviknar ekki lengur í frystihúsum af því að eigendur þeirra hafa grætt svo mikið á aflakvótanum? Ég skal ekki segja.

Man eftir einstaka stórbrunum á öðrum fyrirtækjum á 7. og 8. áratugnum, svo sem á athafnasvæði Eimskips nálægt Borgartúni, Klúbbnum gamla við Borgartún og gamla góða skemmtistaðnum við Tjörnina (nú Listasafn Íslands).

En nú brenna bílar landsmanna sem aldrei fyrr. Er eitthvað í gangi? Nú virðast stórfyrirtæi ekki brenna til grunnna, heldur blikkbeljur landsmanna í hrönnum. Skyldi vera eitthvað líkt með gömlum eigendum frystihúsa og núverandi eigendum (dýrra) ökutækja á Íslandi í dag?

Ástandið er ekki eðlilegt.

Ýmsir brunar hafa orðið á höfuðborgarsvæðinu á s.l. misserum, eða frá árinu 2000. Þeir eru ólíkir brunum á bílum, frystihúsum og eldi (íkveikju) í húsum/blokkum. Þar hafa líklega annarlegar hvatir legið að baki, svo sem ítrekaðar íkveikjur í ónefndu húsi við Vatnsstíg, íkveikjan við Laugar þegar það var í byggingu, bruninn mikli í Faxafeni, stuttu eftir aldamótin 2000.

Tryggingafélögin hér á landi munu líklega fara að hugsa öðruvísi, eftir alla bílabrunana að undanförnu. Bílaeigendur gætu átt von á mikilli hækkun á tryggingagjöldum.

En umfram allt þurfa yfirvöld að fara að huga að meiri löggæslu og eftirliti í ÖLLUM hverfum á höfuðborgarsvæðinu og úti um allt land. Því það virðist sem svo, og tilfinningin er slík að ein aðferðin í að mótmæla ástandinu í niðursveiflunni og kreppunni hér sé jafnvel að birtast í því að kveikja bara í eigum sínum. Sé sjaldan lögreglubíl á sveimi um nætur í miðri viku, og þaðan af síður um helgar, í mínu hverfi. Kannski ekki skrítið, enda mannekla og líklega yfirvinnubann hjá lögreglunni.

Og það sem meira er, að þeir sem kveikja bál af öðrum og annarlegum ástæðum, muni notfæra sér kreppuástandið og fara að kveikja í líka.

Enn einn bílabruninn

Útilokum gastæki - þetta eru stórslysagildrur

Þetta slys er mikið áfall. Og eiga fórnarlömb þess alla mína samúð.

Og vonandi verður slysið öðrum víti til varnaðar.

Ég man eftir nokkrum gassprengingarslysum og gaslekaslysum á s.l. áratug.

Þau voru hrikaleg og í dag hef ég það markmið að nota engin gastæki.

Hvorki gaseldavél né gasgrill.

 

Í síðustu viku var ég að skoða íbúðir til sölu á habil.is og ég útilokaði alfarið

íbúðir sem höfðu gaseldavélar í eldhúsi, ef það kom fram á myndunum.

 

Sem betur fer eru gassprengingar og tengd slys fátíð hér á landi, en

samt þessum slysum ofaukið. Man eftir að gasgrill sprakk í Grafarvogi 2005.

Mildi að enginn slasaðist þar. Á árunum kringum aldamótin síðustu man ég

eftir hryllilegu gasslysi í álverinu í Straumsvík. Fjölskyldumaður lést eftir að

hafa brennst mjög illa eftir sprenginguna.

 

Einnig man ég eftir átakanlegum atburði í veiðihúsi þar sem að þrír einstaklingar

létust eftir að gasleki varð í veiðihúsi. Tveir þeirra sem létust í slysinu voru feðgin.

 

Að auki man ég líka eftir ýmsum fréttum af sprengingum erlendis þar sem heilu

húsakynnin hafa sprungið í loft upp vegna afleiðinga gassprenginga.

Þetta er hryllilegt og hættulegt að elda, kynda og lýsa með gasi.

 

Notum okkar rafmagn á meðan við höfum greiðan aðgang að því.

 

Það virðist hafa komist í tísku og þykja sérlega 'in' og fínt að elda á

gaseldavélum. En einstaka hellur á keramikhelluborðum hafa sömu virkni og

gaseldavélar, þannig að slík skrifli eru óþörf að mínu mati og færir bara hættuna heim.

Sex ungmenni flutt á sjúkrahús

Skrípaleikur í launum bankastjóra

Hvernig má það vera að laun bankastjóra nýju ríkisbankanna eru hærri en laun yfirmanns þeirra, viðskiptaráðherra?

Nýráðinn bankastjóri KB banka skammast sín svo mikið að hann fer fram á launalækkun til að verða ekki milli tannanna á fólki af því að hann er á hærri launum en annar kvenkyns bankstsjóri eins ríkisbankans.

Og svo er annað: einn nýr kvenbankastjórinn vill ekki gefa upp sín laun. Skammast hún sín fyrir að hafa samið um lág laun? Hefur hún kannski bara 900 þúsund í laun á mánuði, sem er dágott, en vill ekki að fjármálaheimurinn viti það, af því að það er svo 'niðurlægjandi.' Ég nefni töluna 900 þúsund, af því að ég heyrði þessa tölu um þessi laun í vikunni.

Bankableðlarnir hafa að mínu mati verið að skammta sér ofurlaun á undanförnum árum og misserum. Þeir eru bara að apa eftir stórum fjármálafyrirtækjum í Ameríku sem borga góð laun + bónusa. Íslenskir bankar eru litlir og hafa ekki efni á slíkum ofurlaunum. Því fór sem fór.

Nýjustu upplýsingar sem ég hef er að starfsmenn hjá Goldman Sacs hafi verið að fá í laun + bónusa á ári sem nemur $660.000.- 

Ef þetta er reiknað í íslenskum krónum (þó að dollarinn sé bara reiknaður á hundrað kall), kemur stjarnfræðileg upphæð í ljós í íslenskum. A.m.k. í mínum huga. Það eru ofurlaun.

Bað um launalækkun

Jón Ásgeir enn og aftur fórnarlamb Séð&Heyrt aðferðarinnar?

Ótrúleg umræða á netinu er búin að vera um hvernig Jón Ásgeir stóð sig í Silfri Egils, eða öfugt, þ.e. hvernig Egill stóð sig; japl, jaml og fuður út af engu. Egill var samur við sig í þessu viðtali, var ekkert æstari en vanalega. Þarna voru bara tveir menn að ræða saman um hitamál. Og Jón Ásgeir má eiga það að hann hélt stillingu sinni, ef honum fannst kannski Egill vera æstur (sem mér fannst ekki), enda í mjög erfiðri stöðu eftir hrun Glitnis. Hann stóð frammi fyrir erfiðum spurningum, sem hann kannski reyndi að svara út úr, en hann æsti sig ekki.

Egill var hvorki vel né illa undirbúinn undir þetta viðtal, vegna þess að þetta var 'stutt' viðtal miðað við umfang, og gæti aldrei orðið eitthvað bitastætt þannig séð. Í svona 'Silfur Egils' viðtalsþætti verða málefnin aldrei annað en smávegis yfirklór og Egill virðist lifa á því.

En getur Egill unnið rannsóknarefni til birtingar í sjónvarpsþætti eða blaðagrein, sem tæki á málunum?

Við verðum að gera greinarmun á sjónvarpsþætti með 'æsifregnastíl' og einhverju virkilega bitastæðu þar sem að þáttarstjórnandi/greinarskrifandi fer virkilega ofan í málin þar sem hann/hún fléttar viðtölum við viðkomandi sem tengjast efninu (ef þeir þora).

Jafnvel grunnskólanemandi getur spjallað við þjóðþekktan Íslending sem lendir í skandal.

En málið er að Íslendingar, eins og svo margir aðrir, gleypa við æsifregnastílnum og skandalnum,
þannig að svona þættir eins og Silfur Egils eru í rauninni ekki á hærra plani en Séð & Heyrt og DV.

Kokgleypir þú loforð pólitíkusa?

Ekki kokgleypa allt það sem stjórnmálamenn hafa talið þér trú um,

eins og þeir hafa verið að gera þessa dagana. Þá á ég við

um að ríkið ábyrgist allar innistæður í bönkunum o.s.frv. eins og

Geir og viðskiptaráðherrann hafa verið að blaðra um undanfarna daga.

 

Þetta eru bara inntóm loforð sem þeir hafa gasprað á

blaðamannafundum í Iðnó. Þú, lesandi góður, hefur ekkert

skriflegt í höndunum um að innistæður þínar í dauðum bönkum,

á nýjum kennitölum, verði aflögufærar þegar þú þarft á á halda.

 

Ef íslenska ríkisstjórnin ákveður að leita liðsinnis IMF,

þ.e. Alþjóðagjaldeyrissjóðsins, verður bæði ríkisstjórnin og

Seðlabankinn gjörsamlega valdalaus. Ég endurtek:

GJÖRSAMLEGA VALDALAUS.

 

Þetta gæti þýtt að allt sparifé landsmanna verði yfirtekið af IMF,

og hreinlega FRYST, þannig að ef þú átt eitthvað inni á bankabók,

er betra að yfirfæra það á eitthvað áþreyfanlegt: t.d. kaupa fasteign.

Það að fjárfesta í steynsteipu á Íslandi hefur yfirleitt borgað sig.

 

Ég sjálf, treysti ekki  bönkunum persónulega (a.k.a. ríkið), sama

hvað þeir segja. Nú er um að gera að eiga eitthvað ÁÞREIFANLEGT.

Amk eitthvað sem Alþjóðagjaldeyrissjóðurinn getur ekki hirt af mér

eða þér. Sama gildir um það sem þú kaupir þér í dag eða á morgun:

listaverk, bækur, fatnað, snyrtivörur, leikföng, áfengi ... eða

annað. 

Rússar og IMF sameinist um lán